Deri tani kemi sqaruar detajet më të thella të logjikës së funksionimit të kompjuterëve. Prandaj, është e nevojshme që të japim një sqarim për rëndësinë e përdorimit të niveleve abstrakte. Pa përdorimin e këtyre niveleve të ndryshme në sqarimin e shkencës kompjuterike, do të ishte gati e pamundur që të kuptohet ajo. Njëjtë sikur të analizohej trupi njeriu, funksionimi i organeve dhe pjesëve tjera, vetëm nëpërmjet analizimit të qelizave.

Deri tani mësuam për funksionimin e transistorëve, ndryshimin e vlerave 0 dhe 1, portat logjike, dhe qarqet. Gjatë funksionimit të kompjuterit në çdo detaj apo proces të caktuar ne kemi të bëjmë me funksionimin e këtyre që i përmendëm. Por, nëse gjatë sqarimit të funksionimit të kompjuterit do të përdornim gjithmonë punën që e bëjnë ato atëherë do të komplikohej shumë. Figura më poshtë e sqaron më mirë rolin e përdorimit të niveleve abstrakte:

Në pjesën e parë më lartë e kemi sqarimin e detajshëm të përdorimit të transistorëve për të kryer një funksion të caktuar që është ndërrimi i vlerave 0 dhe 1. Pastaj vjen pjesa e grupimit të tyre në porta dhe qarqe logjike. Pastaj kemi një grupim tjetër të tyre si psh Memorja, CPU, Hyrje/Dalje (Input/Output). Dhe më në fund kemi kompjuterin si një tërësi e të gjitha elementeve të ndryshme.

Deri në fund të kursit ne do të mësojmë të gjitha nivelet e ndryshme të funksionimit të kompjuterit. Në mësimet e ardhshme do të sqarojmë se si funksionojnë Memorja (Memory), Procesori (CPU), dhe Hyrje/Dalje (Input/Output).